Japanese tech gipresentar ang programa sa solid waste mgmt

GIHATAGAN sa komite sa Environment and Natural Resources ni Konsehal Roger Abaday og kahigayonan ang CHC Agritech, usa ka Japanese Technology, nga ipresentar ang ilang produktong Organic Agriculture and Biological Solidwaste Management.

Sa tigom sa komite niadtong Martes, ang product consultant ug technician sa kompanya mibutyag nga ang ilang produkto organic ug luwas nga gamiton sa agrikultura, aquaculture, animal farming ug solidwaste management.

Matod pa nga nasulayan na kini nga epektibo diha kanhi dumpsite sa Upper Dagong, Carmen ingon man sa merkado sa Cogon apan wala lang makalahutay tungod sa kakulangon sa pundo hinungdan nga karon ilang subling gipresentar sa komite aron makonsidera nga gamiton sa dakbayan.

Nasayran nga daghan na ang pagsulay nga gihimo apan nahunong gumikan sa nasinating pandemya. Sa tinguha nga masuta kun gikinahanglan ang maong teknolohiya,giduso ni Abaday ang tanyag sa kompanya ngadto sa komite sa agriculture ni Konsehal Jay Pascual, City Local Environment and Natural Resources Office (CLENRO), City Agriculture Office ug City Public Services Office (CPSO).