IP Month Celebration kahigayonan mapasundayag ang kabililhon sa mga Lumad sa syudad

“KINI nga panagtigom karon usa ka sakripisyo, paghago, pag-antus aron lang mapaabot, mapadayag sa tibuok katawhan sa dakbayan ug mapakita nato nga kita mao na gyud ang mga tribu nga aduna pay mga panginahanglanon, lamang, gikinahanglan gyud ang panaghiusa.”

Kini ang makapadasig nga mensahe ni Konsehal Datu Roberto Cabaring, chairman sa Komite sa Cultural Communities, atol sa 2024 Indigenous Peoples Month Celebration and IPRA Commemoration.

Ang selebrasyon nagdala sa tema, “Mga Katutubong Dunong: Pahalagahan, Pangalagaan at Parangalan.”

Buot sa konsehal nga wad-on ang paghisgot sa mga kayugot sa kanhi nga mga panghitabo sa mga lideres sa nagkadaiyang tribu kundi magtutok sa umaabot diha sa panaghiusa aron makab-ot ang gitinguha ug gipangandoy nga makaangkon og dakong kalamboan kanatong mga lumad.

Alayon niini, gipasalamatan ni Cabaring ang kagamhanang lokal ubos ni Mayor Klarex Uy, uban sa pag-abag sa konseho sa syudad ubos ni Bise Mayor Bebot Rodriguez ug sa mga hintungdang ahensya nga nagpasiugda sa pagmugna sa maong selebrasyon kay nahatagan ang mga lumad nga anaa sa kadaplinan sa syudad og kahigayonan pagpasundayag sa kabililhon sa ilang mga kontribusyon, kabilin, kultura ug mga hiyas diha sa komunidad.