IP Month celebration gihingusgan ni Konsehal Cabaring

GIHINGUSGAN ni Konsehal Roberto Cabaring, Chairman sa Komite sa Cultural Communities, nga magmabulokon ug magmalamposon ang umaabot kasaulogan sa Indigenous Peoples (IP) Month dinhi sa dakbayan sa Cagayan de Oro.

Kini ang gibutyag sa konsehal atol sa tigom human gituki ang gisugyot nga mga programa pahaom sa kasaulogan sa IP Month karong Oktubre 24, 2024 nga nagdala sa tema, Mga Katutubong Dunog: Pahalagahan, Pangalagaan at Parangalan.

Gitumbok ni Cabaring nga diha sa pagselebrar sa IP month, mapasundayag ang ilang mga kontribusyon diha sa komunidad, ug mapalambo ang ilang mga katungod sa kultura.

Niini, ang komite mimugna og Technical Working Group (TWG) sa panguna ni Konsehal Bernie Esparcia, uban sa mga representante sa buhatan sa Department of Education (DepEd), National Commission on Indigenous Peoples (NCIP), City Social Welfare and Development (CSWD) ug ang mga nangulo sa 16 ka tribu dinhi sa syudad aron nga matutokan ang mga gikinahanglang paghan-ay sa maong kasaulogan.

Mitambong sa tigom sila si Konsehal Malou Gaane, James Judith, II ug Aga Suan nga mipadayag sa ilang hugot nga pagsuporta sa umaabot nga kalihokan nga gitagana alang sa mga lumad sa syudad.