IP Alternative Dispute ordinance tukion sa komite ni Cabaring

GIPAABOT tukion sa Komite sa Cultural Communities ni Konsehal Datu Roberto Cabaring ang sugyot ordinansa nga giduso ni Konsehal James Judith, II.

Ang maong sugyot ordinansa may kalabotan sa paghusay ginamit ang tradisyonal nga paagi sa mga panaglalis sa mga Lumad nga tawagon isip “IP Alternative Dispute Ordinance”.

Tumong sa maong sugyot ordinansa ang pagpreserbar sa mga katungod sa IP nga boluntaryong naggamit sa tradisyonal nga paagi sa paghusay sa mga panaglalis pinaagi sa council of elders nga sakop sa Indigenous Cultural Communities (ICC) ug girekognisar sa National Commission on Indigenous Peoples (NCIP).

Subay sa Indigenous Peoples’ Rights Act of 1997, ang mga Lumad adunay katungod sa paggamit sa ilang kaugalingon og gidawat nga sistema sa hustisya, sa pagsulbad sa panagbangi, mga proseso o mekanismo sa kalinaw ug uban pang naandan nga mga balaod ug gawi sulod sa ilang tagsa-tagsa ka komunidad ug nga mahimong nahiuyon sa nasudnong legal nga sistema ug sa internasyonal nga pag-ila sa tawhanong katungod.