IP Alternative Dispute Ordinance padayong gitun-an ni Cabaring

PADAYONG gitun-an sa komite sa cultural communities ni Konsehal Datu Roberto Cabaring ang sugyot ordinansa nga giduso ni Konsehal James Judith, II nga gitawag og Indigenous Peoples Alternative Dispute Ordinance.

Kini human nadungog sa milabayng tigom ang opinyon ni Atty Dexter Precioso, legal officer sa National Commission on Indigenous Peoples,  kinsa misugyot og mga special provision nga masukip sa maong sugyot ordinansa.

Matod ni Atty Precioso nga ang matag ancestral domain (AD) importante kaayo kay bisan pareha nga IP group anaa silay lain-laing pamaagi sa pagsulbad sa panagbangi. Bahala asa mag-abot ang isyu, kung naay panagbangi sa IP, didto gayud na dalhon sa ilahang tradisyonal og kostumbre nga praktis ang mopatigbabaw.

Sa mga kaso diin ang AD adunay mga reglamento, mga giya o mga pamaagi sa pagsulbad sa mga panagbangi, parehas nga hatagan og pagtahod.

Alayon niini, gitahasan ni Konsehal Cabaring si Konsehal Judith sa pagsumite sa final draft ordinance aron maduso ngadto sa buhatan sa City Legal Office alang sa pagrepaso ug pagtoon niini. (RNQuiblat/SP)