Internship, work immersion program dihas City Hall gipalapdan

HAYAN mapadali na ang proseso sa mga tinun-an nga magpahigayon og internship o’ work immersion dinha sa pipila ka departamento sa City Hall.

Kini human gisumete ni Mayor Rolando “Klarex” Uy ngadto sa konseho sa syudad ubos ni Bise Mayor Bebot Rodriguez ang sugyot nga Standardized Memorandum of Agreement (MoA) tali sa kagamahanan sa dakbayan ug mga hintundang tunghaan. Ang maong sugyot naglangkob sa programa sa work immersion alang sa mga tinun-an sa Senior High School ug internship alang sa nagtungha sa kolehiyo sa lain laing tunghaan.

Tumong sa sugyot nga dili na kinahanglan mangayo pa og katungod sa mayor matag adunay pagahimuong work immersion o’ internship sa mga tinun-an ug mapadali ang pagproseso sa mga papeles alang sa programa. Ang maong lakang konsiderahon sa komite sa edukasyon ni Konsehal Suzette Magtajas-Daba.