Insentibo sa mga sertipikadong “Bagwis” establisamento gisugyot

Padayong tun-an sa Komite sa Ways and Means ni Konsehal George Goking ang sugyot paghatag og insentibo sa mga establisamentong natukod dinhi sa syudad nga “Bagwis” certified sa Department of Trade and Industry (DTI).

Ang DTI-Bagwis Program nag-ila sa mga establisamento nga nagbulig ug nakigbisog alang sa katungod sa mga konsumedor samtang nagpatuman sa responsableng pagnegosyo. Ang programa nagdasig sa pagpahimutang og Consumer Welfare Desks (CWDs) o’ susamang customer relations office dinha sa mga malls ug nag-provide og impormasyon ngadto sa mga konsumedor gawas pa nga nagsilbi kining mekanismo alang sa daling solosyon sa mga reklamo.

Ubos sa sugyot mao ang fiscal incentives nga naglakip sa paghatag og 10%, 20% ug 30% nga diskwento sa bayarang business tax ngadto sa mga Bronze, Silver ug Gold Awardees sa “Bagwis” program sa DTI.

Gisugyot usab ang non-fiscal incentives sama sa express o’ special lane alang sa renewal sa business permit application, pag-ila isip prioridad nga supplier sa mga palaliton sa gobyerno, pag-promote ngadto sa mga konsumedor ug prioridad dinha sa pagkolekta sa basura.

Niini, si Goking mipasabot nga ang maong sugyot ilabina sa mga negosyante apan angayang matun-an ang pagtunol og diskwento sa business tax tungod kay makaapekto usab kini sa panudlanan sa dakbayan.