Importansya sa kababaehan angayng saulogan adlaw adlaw –Moreno

Dili lang panahon sa Marso atong saulogan ang kabililhon sa kababaehan kun dili sa tibouk tuig. Mao kini ang panawagan ni Konsehal Imee Moreno ngadto sa liboan ka mga kababaehan nga mitambong sa Women’s Summit kagahapong adlawa diha sa USTP Gym.

Ang kasaulogan dili kabahin sa pagpanghatag kun dili sa pagsabot sa papel sa usa ka babaye dili lang dinha sa pamilya kun dili sa komunidad, dugang sa konsehal. Matod niya nga daghang mga proyekto ug programa ang gihimo sa administrasyon ni Mayor Klarex Uy aron maabagan ang kababaehan nga mapaarang ang ilang kinabuhi.

Apan, aduna pay mga babaye nga wala makahibalo sa ilang kabililhon taliwala sa suporta nga gihatag sa gobyerno. Gani, angay kitang magpasalamat kay aduna kitay mga balaod nga nagproteher sa katungod sa kababaehan, sumpay sa konsehal.

Niini, siya nagdasig sa kababaehan nga pahimuslan ang mga programa nga gihan-ay sa gobyerno alang kanila. Iyang gitumbok ang mga programa sa CDO-TVI nga makatabang gayud nga mapalambo ang kapangitaan sa matag usa. Si Konsehal Moreno usa sa mipirma sa commitment nga magpalapad sa padayong pagproteher sa katungod sa kababaehan.

Ang Pakigduyog: Women’s Summit gipasiugdahan sa Lokal nga kagamhanan sa dakbayan sa Cagayan de Oro, DSWD, Philippine Commission on Women inubanan sa lain laing mga ahensya sa gobyerno ug pribadong mga establisamento.