Implementasyon sa dugang programa, proyekto sa Brgy. Tuburan mapatuman na

HAYAN mapatuman na sa Barangay Tuburan ang ilang dugang mga programa ug proyekto nga gipundohan karong tuiga.

Kini human ang konseho sa syudad atol sa sesyon niadtong Lunes nga gidumala ni Presiding Officer Pro Tempore Councilor Romeo Calizo misagop sa resolusyon nga nag-uli sa ordinansa sa barangay diin nasukip ang ilang 2024 Annual Budget nga adunay gibanabanang kinitaan og galastuhon balor P4,183,047.00.

Lakip sa gipundohan mao ang 20 porsyentong (20%) Development Fund balor P604,609.00; samtang P418,305.00 usab ang gigahin alang sa pagpatuman sa mga programa sa Sangguniang Kabataan; P146,406.00 alang sa Barangay Disaster Risk Reduction Management Fund; P200,000.00 alang sa rehabilitasyon sa ilang Multi-Purpose Hall; P80,000 ang gigahin sa de-clogging sa ilang mga canals ug uban pang mga programa nga gilantaw’ng maghatag kaarangan sa ilang serbisyo ngadto sa katawhan.

Ang 2024 annual budget sa Barangay Tuburan miagi sa makuting pagtuon sa mga komite  ug nasuta nga nahiuyon sa balaod ug mahimo nang ipatuman.

Ang resolusyon nga gipalabang sa konseho alang sa maong katuyoan gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ni Konsehal Edgar Cabanlas.