Imbentaryo sa pipila ka housing projects sa syudad gihingusgan ni Konsehal Abbu

“KASABOT ko nga anaay daghang proseso ang paga-agian ayha mabalhin sa atong mga housing projects ngadto sa mge beneficiaries, apan gusto usab nato nga malamdagan ang kahimtang sa ilang relokasyon niining mga pamilya nga biktima sa demolisyon  ug nasunogan.”

Kini ang unod sa special report ni Konsehal Joey Abbu, Jr., chairman sa Komite sa Labor and Employment atol sa sesyon sa konseho sa Martes nga gidumala ni Bise Mayor Bebot Rodriguez.

Matod ni Abbu nga bag-ohay lamang niya  nahinabi ang mga na-demolish niadtong  Pebrero, ning tuig sa Zone 5, Barangay Carmen ug giingon  nga  hangtod karon wala pa sila na-relokar sa rason nga puno na ang mga relocation sites sa dakbayan.

Sumala ni Abbu  nga iyang  mahinumdoman  sa  milabayng session  nga gitahasan ni Konsehal  Edgar Cabanlas ang  City Housing and Urban Development Department (CHUDD)  pagpahigayon og parallel investigation ug  hatagan sa kopya  ang konseho  ingon man pag- imbentaryo sa mga housing projects  sa  mga relocation sites  aron masayran kun pila  na  ka units ang bakante  ug  kon kwalipikado ba ang mga benepisaryo nga kasamtangang nanimuyo niini.

Apan gitataw sa konsehal nga  hangtod karon walay  taho  ang  CHUDD, tingali  kung naa man, si Konsehal Cabanlas lang ang nahatagan sa kopya niini.

Niini, nanghinaut si Konsehal Abbu nga unta mapahibalo ang konseho  kon magsumite ang buhatan sa kopya sa imbentaryo sa mga housing projects  sa mga relocation sites aron usab kini mahisgutan sa Komite sa Urban & Rural Poor and Housing Development ubos ni Konsehal Edgar Cabanlas.