Ilegal nga pagmina sa Barangay Tuburan kompirmado - Konsehal Esparcia

“ADUNAY nahitabong illegal nga pagmina sa Barangay Tuburan ning syudad.”

Kini ang gibutyag ni Konsehal Bernie Esparcia atol sa tigom sa adhoc committee sa miaging semana nga gidumala ni Konsehal Roger Abaday human si Regional Director Engr. Rodante Felina sa Department of Environment and Natural Resources (DENR) mikompirma nga aduna gayoy nahitabong illegal nga pagmina sa nahisgutang barangay.

Atol sa maong tigom, ang Philippine National Police (PNP) ug Armed Forces of the Philippines mikompirma usab nga adunay nakitang mga ebidensiya sa dapit sama sa gamit sa pagmina ingon man paraphernalias. Hinoon nagpabilin pang gawasnon ug wala masikop ang maong mga gireklamo tungod wala kini maaktohi nga nagmina.

Sumala pa ni Director Felina, nga sa ilang gipahigayong imbestigasyon, nasayran nga ang maong mga indibidwal taga Davao Oriental ug hugot nilang gipanghimakak nga sila nagmina tungod kay ang katuyuan dili man pagmina kon dili pag-quarry lang, butang nga dili kombensido ang mga sakop sa komite.

Subay niini, ipadayon sa adhoc committee ang ilang imbestigasyon ug pakisayod sa sunod tigom arun mahunong gayod kining ilegal nga mga kalihukan.