IDP sa City College giaprobahan sa Konseho

HAYAN dugang kalamboan sa natad sa edukasyon ang matagamtaman sa katawhan sa dakbayan sa Cagayan de Oro.

Kini human hiniusang giaprobahan sa Konseho sa milabayng sesyon nga gidumala ni Bise Mayor Bebot Rodriguez ang Ordinance No. 147111-2024 kon City College Institutional Development Plan (IDP).

Mahinumdoman si Mayor Klarex Uy miluwat og Executive Order No. 310-2023 nga nag-organisar pag-usab sa City College Governing Board diin maoy gitahasan sa pagmugna og mga polisiya, pagpangita og mga kahinguhaan ug magdumala sa operasyon sa City College sa dakbayan.

Alayon niini ang Konseho mipalabang og Ordinance No. 14654-2023 alang sa pagmugna og City College ug Resolusyon No. 14800-2024 nga nagsagop sa 2024 – 2029 Institutional Development Plan (IDP). Ang IDP usa sa  pinakamahinungdanon nga rekisito sa Commission on Higher Education (CHEd) aron mahatagan og katumanan ang pag-abli sa kolehiyo karong tuiga .

Niini, nagpasalamat si Konsehal Suzette Magtajas-Daba, Chairman sa Komite sa Edukasyon, sa administrasyon ni Mayor Klarex Uy sa padayong paghatag importansya sa kaugmaon sa kabataan sa dakbayan.

Ang ordinansa nga gipalabang sa Konseho alang sa maong katuyoan gipaluyohan sa Komite sa Edukasyon ni Konsehal Daba ug sa Komite sa Pamalaod ubos ni Konsehal Edgar Cabanlas.