ICT equipment gidonar pabor sa CDO

Hayan mahitsasan pa ang mga gikinahanglang ekipo ug kagamitan sa Public Employment Service Office (PESO) aron mapalapdan pa ang pagsilbi sa katawhan.

Kini human ang konseho sa syudad sa sesyon niadtong Lunes nga gidumala ni Bise Mayor Bebot Rodriguez mipalabang sa ordinansa nga naghatag og katungod ni Mayor Klarex Uy paglagda sa Deed of Donation tali sa Department of Labor and Employment (DoLE) alang sa unom ka ICT items ug uban pang ekipo nga magamit sa PESO.

Kini naglangkob sa upat ka drawers steel cabinet, Samsung Galaxy tablet A7 Lite, computer speaker, external hard drive, tablet keyboard ug wireless mouse nga magamit sa pagpalapad sa JobStart Program sa buhatan nga anaa na sa ikapitong hugna sa implementasyon.

Si Konsehal Girlie Balaba, chairman sa komite sa labor and employment ug usa sa nagpaluyo sa gipalabang nga ordinansa, mipadangat sa iyang pasalamat sa DoLE sa walay puas nga pag-abag sa kagamhanan sa dakbayan dinha sa pagpatuman sa mga programa nga magdala og dugang kahigayonan sa pagpanarbaho dili lang sa mga Kagay-anon kun dili lakip na sa kasikbit nga mga munisipyo.

Ang ordinansa nga gipalabang alang sa maong katuyuan gipaluyohan usab sa komite sa pamalaod ni Konsehal Ian Mark Nacaya.