Hulagway ni Elizaga sa lobby sa Exec House mapabalik

Giduso ngadto sa Historical Commission (HisCom) - City Museum ang sugyot pagpabalik sa hulagway ni kanhi Mayor ug Bise Mayor John Elizaga uban sa mga kanhi namunu-an sa syudad dinha sa lobby sa Executive House.

Kini human nagtigom ang komite sa turismo ni Konsehal Jay Roa Pascual og nagtahas sa buhatan pagpakopya sa hulagway sa kanhi bise mayor nga naka-display diha sa Legislative Building.

Gitahasan usab ni Pascual ang HisCom sa pagpakopya o’ pagpreserbar sa tanang mga hulagway aron kun ugaling mausab kini nga panghitabo daling makakopya tungod kay aduna namay digital copy.

Sa maong tigom, gisugyot ni Pascual ang pag-digitize pinaagi sa slideshow sa tanang mga hulagway sa mga kanhi mayor dinhi sa City Hall o’ sa museum uban sa ilang mga nahimong kalampusan panahon nga sila namunoan, dako pa tan-awon sa television ug dali makita ang ilang tagsa-tagsa ka kalampusan gawas pa nga very informative usab kini, pamahayag ni Pascual.

Niini, si acting City Tourism Officer Rico Libre miingon nga anaa man gayud sa usa ka museum ang mga hulagway sa nangaging namunoan kay kabahin sila sa kasaysayan ug dako kini nga hagit sa ilang buhatan kay gamay ang museum sa syudad itandi sa ubang mga syudad.

Ang tigom gitambongan nila ni Konsehal Jose Pepe Abbu Jr. ug Aga Suan.