House of Hope Psychiatric Care Facility dumalahon sa City Hospital

Gilantaw nga mabalhin na sa JR Borja General Hospital (JRBGH) ang pagdumala sa Custodial Psychiatric Care Facility sa House of Hope. Kini human giduso ni Mayor Klarex Uy ngadto sa konseho sa syudad ubos ni Bise Mayor Bebot Rodriguez ang sugyot Memorandum of Agreement (MoA) tali sa kagamhanan ug House of Hope Foundation, Inc. nga magbalhin sa pagdumala sa maong facilidad gikan sa Foundation paingon sa JRBGH kon City Hospital.

Ang maong lakang subay sa Ordinance No. 14297-2022 kon Mental Health Code of Cagayan de Oro. Ubos sa ordinansa, ang custodial psychiatric facility pagadumalahon sa JRBGH kinsa adunay mga doktor ug kawani nga hanas sa pag-atiman sa mga pasyente sa facilidad.

Niini, gipaabot nga mapadayon ang pagtunol sa dakbayan sa P3 milyones nga financial assistance ngadto sa Foundation ug tugutan usab ang mga sakop sa Missionary Congregation of Mary (MCM Sisters) nga magamit ang ilang kombento sulod sa compound aron mapadayon ang ilang apostolic ug missionary duties ug services.