Hingpit nga pagpatuman sa parking bay fees dihas EWTPM gihingusgan

Gisugyot ni Konsehal Romeo Calizo, chairman sa komite sa Public Utilities, Energy and Transportation, nga magmugna og usa ka Technical Working Group (TWG) aron magtuon sa pagpatuman sa checkpoints nga magsusi sa parking bay fee tickets diha sa East ug Westbound Terminal and Public Market (EWTPM) sa Bulua.

Tinguha niini nga masigurong kompleto nga mahan-ay ang plano ug konsepto nga matabang sa konseho.

Kini human gihangyo ni Officer-In-Charge Cheche Peñalosa sa East-Westbound Terminal and Public Market, atol sa milabayng tigom sa komite nga unta mapatuman sa hingpit ang mandato sa ordinansa sa parking bay fees tungod kay daghan sa mga driver ang dili gasunod sa ruta nga mo-agi sa terminal ug dako ang mawala sa kinitaan sa syudad.

Niini, si Calizo mitudlo ni Peñalosa nga maoy mangulo sa maong TWG uban sa Roads and Traffic Administration (RTA), City Legal Office, City Administrator’s Office ug uban pang opisina sa gobyerno lokal.

Samtang gihangyo ni Calizo ang mga kawani sa Roads and Traffic Administration (RTA) nga motabang sa pag-enforsar sa maong balaod samtang gihan-ay pa tanan ang mga lakang alang sa maong katuyuan.