Hingpit nga pagpatuman sa burial aid sa mga beterano tun-an

GIPAABOT tun-an sa Komite sa Social Services ni Konsehal Girlie Balaba ang hingpit nga pagpatuman sa ordinansa sa dakbayan nga nagtanyag og burial assistance sa mga beterano.

Kini human si Konsehal Romeo Calizo nanawagan nga unta matunol na ang gilatid sa Ordinance No. 10597-2007 nga tag-P10 mil nga burial assistance ngadto sa mga Kagay-anong beterano.

Gipasabot ni Calizo nga taliwala sa gipalabang nga ordinansa, daghan sa pamilya sa mga mitaliwang beterano ang dili gapakadawat sa maong ayuda tungod sa kakulangon sa kahibalo sa mga kawani sa buhatan diin gisangon ang pag-apod-apod niini.

Matod niya nga adunay budget matag tuig apan walay gakahatagan. Gani, siya midugang nga sa milabayng mga bulan 11 ka mga beterano ang mitaliwan ngadto sa laing kalibutan apan ang mga pamilya wala gayud makadawat sa gitanyag sa dakbayan nga ayuda.

“Kining mga beterano dili pasabot nga kadto lang nagsilbi sa world war apan lakip ang mga nagsilbi human sa world war ug usab dili tanang beterano mga sakop sa senior citizens. Adunay mga beterano nga 45 anyos o’ 50 anyos pa lang ug angayan nga modawat sa ayuda,” pasabot ni Calizo. (Photo by Immigration Impact)