Hingpit nga koordinasyon sa CEO, mga barangay gihingusgan ni Seno

KINAHANGLANG tabangan ang kabarangayan sa pagtuman sa ilang mga proyekto ilabina sa mga drainage canal ug kadalanan.

Kini ang panawagan ni Konsehal John Michael Seno ngadto sa City Engineering Office atol sa milabayng tigom sa komite sa public works nga gitambungan sa mga hepe sa lain laing departmento ug ahensya sa gobyerno.

Iyang namatikdan nga adunay mga proyekto sa barangay nga sub-standard ang pagkatrabaho ug hinungdan kini nga dali ra nga mangadaot ang dalan ug adunay mga kanal nga gaawas gihapon ang tubig.

Hinuon, nasabtan sa konsehal nga walay mga enhenyero ang mga barangay ug gikina-hanglan gayud niini ang pag-abag sa ubang ahensya sa gobyerno.

Dili mahimo nga pasagdan nato ang pagpatuman sa proyekto kay kwarta gihapon sa katawhan ang gigamit niini hinungdan nga kinahanglan nga de kalidad ang pagkatrabaho ug dili mahimo nga basta lang nga naay proyekto, pamahayag ni Seno.

Niini, gihangyo ni Konsehal Seno ang CEO nga makigtambayayong sa mga opisyal sa barangay aron sila matabangan.