Hingpit nga pagpatuman sa road safety ordinance gisuportahan ni Calizo

SUPORTADO ni Konsehal Romeo Calizo, Chairman sa Komite sa Public Utilities ug Public Safety, ang higpit nga pagpatuman sa road safety ordinance, labina ang pagsuot og helmet.

Kini ang reaksyon sa konsehal sa special report ni Konsehal Roger Abaday sa sesyon sa konseho niadtong Lunes nga gidumala ni Bise Mayor Bebot Rodriguez  nga nanawagan alang sa hugot nga pagpatuman  sa maong ordinansa sa tinguha nga mapugngan ang mga aksidente sa kadalanan labina sa  mga nagmaneho sa motorsiklo.

Si Konsehal Calizo mibutyag nga bag-o lang  naaprobahan ang road safety ordinance ug traffic code  maong gidahom niya  nga hitsas  na ang Roads and Traffic Administration (RTA) sa speed gun ug breath analyzer nga magamit sa ilang operasyon.

Hinuon, gipasabot niya nga adunay mga panghitabong aksidente  sa dalan nga natigayon  tungod  kay kulang  og disiplina ang mga nalambigit niini.

Gisugyot ni Konsehal Calizo nga maduso sa iyang komite ang report ni Konsehal Abaday aron mapangitaan sa maayong konsepto kon unsaon nga makunhoran ang aksidente nga naglambigit sa motorsiklo aron nga maprotektahan ang kinabuhi sa katawhan.