Higalaay Festival 2024 suportado ni Abbu

SI Konsehal Joey Abbu, Jr, Chairman sa Komite sa Labor, kusganong misuporta sa Higalaay Festival 2024 diin sama sa naandan kini ang makaaghat sa daghang turista nga moanhi nga makadugang pagpalambo sa ekonomiya sa syudad.

Kini ang gibutyag sa konsehal atol sa pagpakayab sa nasudnong bandila diha sa Barangay San Simon, ning syudad.

Sa iyang pagbisita sa barangay, iyang gipahibalo nga sa nagsingabot nga kapistahan sa dakbayan sa Cagayan de Oro, usa sa nakahan-ay nga mga kalihokan sa Higalaay Festival 2024 mao ang Fiesta sa Barrio.

Niini, si Abbu miagni sa konseho sa barangay ubos ni Kapitan Fernando Edrolin nga mag-apil sa barrio fiesta, maghiusa ug makigselebrar pinaagi sa pagsuporta sa mga kalihokan nga giandam alang sa Higalaay Festival 2024.