HEA payroll gi-process na

PORMAL nga gituki sa komitiba sa panglawas sa Konseho ubos ni Konsehal Maria Lourdes S. Gaane ang special report ni Konsehal Imee Rose P. Moreno bahin sa nadugay nga pag-release sa Health Emergency Allowance (HEA) ngadto sa mga healthcare ug non-healthcare workers sa syudad.

Nasayran nga ang pondo sa HEA, nga naglangkob sa 16 ka bulan nga allowance, alang sa Disyembre 2021, Abril 2022, Hunyo hangtod Disyembre 2022, ug Enero hangtod Hulyo 2023, nadawat na sa kagamhanan sa dakbayan niadtong Disyembre 2024.

Sumala ni City Health Officer Dr. Rachel D. Dilla, ang payroll sa HEA gisumite na sa City Budget Office niadtong Enero 27, 2025, ug gilauman nga mahuman ang proseso sulod sa duha ka semana aron mapagawas ang maong pondo.

Ang HEA makabenepisyo sa kapin sa 2,000 ka mga benepisyaryo, nga mahatagan og P9,000 alang sa high-risk personnel, P6,000 alang sa moderate-risk, ug P3,000 alang sa low-risk, dugang sa opisyal.

Nunot niini, naglaum si Konsehal Gaane nga mapagawas na ang HEA sa ikaduhang semana sa Pebrero.

Gipasabot sad sa konsehal nga ang matag benepisyaryo gi-categorize sa ilang mga lider base sa ilang risk level.

Matod pa nga ang barangay health workers (BHWs) nga nagbuhat lamang og surveillance ug walay direct contact sa mga pasyente dili maapil sa high-risk category.

Ang mga high-risk personnel naglakip lamang sa mga medical technologist ug mga doktor nga nadestino sa COVID-19 Isolation Units (CIUs) ug Temporary Treatment and Monitoring Facilities (TTMFs), dugang pasabot ni Gaane.

Atol sa pandemya sa COVID-19, ang Department of Health nagpahamtang og mga klasipikasyon base sa exposure level aron mahatagan ug prayoridad ang testing ug safety protocols.

Ang Sub-group E1 naglakip sa mga personnel nga adunay direct exposure, sama sa mga nagtrabaho sa quarantine facilities ug swabbing centers. Samtang ang Sub-group E2 naglakip sa mga personnel nga adunay indirect exposure sa special concern areas, sama sa mga quarantine control personnel, mga empleyado sa lokal nga kagamhanan, ug border patrol officers. Kini nga klasipikasyon nakatabang sa epektibong pag-apod-apod sa mga kahinguhaan ug pagpanalipod sa mga frontline workers atol sa pandemya. (JAOclarit/SP)