Hangyong tax exemption sa RCCCP giaprobahan sa konseho

Gawasnon na sa pagbayad sa amusement tax ang Resident Company of the Cultural Center of the Philippines (Philippine Ballet Theatre).

Kini human ang Konseho sa Syudad sa sesyon kagahapon nga gidumala ni Bise Mayor Bebot Rodriguez mipalabang  og ordinansa  nga nag-aprobar sa gihangyong  tax exemption  sa kompanya   sa ilang  ipahigayong pasundayag nga giulohag  “Music in Motion” sa umaabot Abril 22 ning tuig diha sa Atrium  Hall, LimketKai Center.

Ang maong kompanya usa ka non-stock, nonprofit nga korporasyon nga rehistrado sa Securities and Exchange Commission nga naestablisar aron pagmugna ug pag-institutionalize sa professional ballet company nga makiglambigit sa pagpalambo sa talent ug kahibalo sa mga magsasayawng Filipino, choreographers, musician ug ubang artist nga mag-promote sa kinatibuk-ang interes sa ballet arts pinaagi sa public presentation sa tibook nasod.

Sumala pa nga ang pag-exempt kanila sa pagbayad sa amusement tax maghatag kanila’g kaikag sa pagpadayon sa ilang bililhon nga  trabaho.

 Ang ordinansa nga gipalabang sa konseho alang sa maong katuyoan gipaluyohan sa Komite sa Ways and Means ubos ni Konsehal George Goking ug Komite sa Pamalaod ug Reglamento ni Konsehal Edgar Cabanlas.