Hangyong paglimpyo sa Kolambog Creek hisgutan sa komite ni Cabanlas

HISGUTAN sa Komite sa Public Works, ubos ni Konsehal Edgar Cabanlas, atol sa tigom karung alas 9:30 sa buntag diha sa hawanan sa konseho ang hangyo ni Engr. Lilibeth N. Aparecio, Regional Director sa Department of Public Works and Highways (DPWH-10), nga mahawanan ang tanang nakababag nga istraktura sa gitukod nga flood control project diha sa Kolambag Creek, Lapasan, ning syudad. 

Sa iyang sulat ni Mayor Klarex Uy, mibutyag si Aparecio nga tungod kay nagsing-abot na ang ting-ulan, gitugonan na ang Jejor’s Construction Corporation, kontraktor sa maong proyekto, nga paspason na kini og human. 

Apan daghan pang nakababag nga istraktura sa Kolambog Creek nga nahimutang subay sa linya sa flood wall niini, hinungdan sa pagkalangan sa pagkompleto sa proyekto, dugang niya.

Nunot niini, gidapit sa maong tigom si Department of Public Works and Highways-10 Regional Director Lilibeth N. Aparecio, ingon man ang mga district engineers sa distrito uno ug dos nga sila si Engr. Ana Lee M. Manzano ug Engr. Jan Paulo C. Lisondra, City Administrator Roy Hilario P. Raagas, City Legal Officer Kenneth O. Tamala, City Engineer Joel V. Momongan, ug si Mr. Antonio Ramon S. Resma, Jr., chairman sa City Task Group Demolition Team. 

Aron madungog ang ilang panahom, gipaabot usab nga motambong sila si Konsehal Roger Abaday, Joyleen Marcedes Balaba, Jay Pascual, Maria Lourdes Gaane, Malvern Esparcia, Yan Lam Lim, Minority Floor Leader Christian Rustico Achas, ug si Bise Mayor Bebot Rodriguez.