Hangyo sa taga-Zone 4 Pasil, Kauswagan giaksyonan sa Urban Poor

Gidapit sa komite sa Urban and Rural Poor and Housing Development ni Konsehal Edgar Cabanlas pagtambong sa umaabot tigom ang kadagkuan sa Department of Environment and Natural Resources (DENR) ug Department of Public Works and Highways (DPWH).

Kini aron paghatag og katin-awan sa ilang gipatumang proyekto sa tulay nga matod pa nakasulod sa Zone 4 Pasil, Kauswagan ug gikabalaka sa mga residente nga mapapahawa sila sa dapit.

Matud ni Cabanlas nga dili angayang mabalaka ang mga residente kay ang lote nga ilang giokupahan gipanag-iyahan sa syudad ug kabahin sa gipatumang Piso-Piso Program ug gi apod-apod ngadto sa mga benepisiaryo.

Hinuon, gikatingala ni Cabanlas ang mulo sa mga molopyo tungod kay walay koordinasyon ang DPWH sa pagpatuman sa proyekto nga adunay maapektohang mga molopyo sa ilang proyekto.

Mahinumduman nga nabalaka ug nagpatabang ang mga residente nga mapabilin sa dapit tungod kay duol lang sa ilang kapanginabuhian ug sa tunghaan sa ilang mga tinun-an.