Hangyo sa taga-Consolacion tun-an sa TF Emancipation

Giduso ni Konsehal Edgar Cabanlas, chairman sa Komite sa Urban and Rural Poor and Housing Development, ngadto sa Task Force Emancipation ang hangyo sa mga residente sa Isla Baksan ug Isla Bugnaw sa barangay Consolacion nga malugwayan ang ilang pagpuyo sa dapit samtang nagpadayon ang socio-economic profiling sa mga posibleng benepisaryo sa relokasyon sa gobyerno.

Sa milabayng tigom sa komite, si Bernadette Akut, president sa kapunungan, mibutyag nga aduna pay pipila ka mga molopyo ang wala pa makabalhin tungod kay nagpa-abot nga marelokar sa gobyerno ug adunay uban nga nahatagan na sa relokasyon apan nagpabilin gihapon sa dapit.

Nasayran nga gihatagan lamang sa TF Emancipation taman sa kapatapusan ning bulan sa Hulyo ang pagpauyo sa mga molopyo sa dapit ug gimando na ang pagbalhin tungod kay anaa kini sulod sa danger zone ug gidili na ang pagpuyo sa maong dapit.

Sa iyang bahin, si Atty. Egay Uy, miyembro sa task force, mipadayag sa iyang kabalaka nga kun dili mapatuman ang pagpabalhin kanila posibleng magdaghan ang mga nanimuyo sa dapit tungod kay namalik na og puyo ang uban taliwala nga nahatagan na sa relokasyon ug adunay pipila nga dili mga residente nga nagtukod na og temporaryong barong-barong nga makadugang sa problema sa gobyerno.