Hangyo sa Rio Verde hisgutan sa komite ni Calizo

HISGUTAN karong  buntag  atol sa tigom sa Komite sa Pubic Utilities nga dumalahon ni Konsehal Romeo Calizo ang sulat ni  Joffrey Hapitan, presidente sa Rio Verde Water Consortium, Inc., nga  naghangyo  sa konseho pagsagop og resolusyon nga magpadayag  walay pagsupak sa ilang laraw pagsupply og tubig  sa katawhan sa Cagayan de oro.

Mahinumduman nga sa miaging tigom, si Hapitan una nang mipadayag nga interesado ang RVWCI nga mosupply og  tubig aron  makatabang sila pagsulbad sa kakulangon sa tubig nga kasamtangang nasinati  sa katawhan.

Gipaabot motambong sa maong tigom aron ipadayag ang ilang opinion sila si Konsehal Calizo, Maria Lourdes Gaane, Kenneth John Sacala, Malvern Esparcia ug Bise Mayor Bebot Rodriguez.

Niini, gidapit usab sa komite sila si City Administrator Atty. Hilario Raagas, City Legal Officer Atty. Kenneth Tamala, Engr. Nonito Oclarit sa RTA, Engr. Rosanna Rodriguez, officer in-charge sa Office of the Building Official, CLENRO Officer Engr. Armen Cuenca ug Acting City Engineer Engr. Joel Momongan pagtambong sa tigom.