Hangyo sa PUPSAI giaksyonan ni konsehal Cabanlas

GITAHASAN sa komite sa urban and rural poor sa konseho ubos ni Konsehal Edgar Cabanlas ang Task Force Emancipation pagpahigayon og imbetigasyon sa kahimtang sa Purok 6 Urban Poor Settlers Association (PUPSAI) diha sa Barangay Gusa ning syudad ug pagsumite og report.

Kini nunot sa hangyo ni Gusa Punong Barangay Marlo Tabac ug sa mga sakop sa kapunongan nga matabangan sa pagpatitulo sa lote nga kasamtangan nilang giokupahan.

Nasayran ang maong lote giingong gipanag-iyahan sa gobyerno tungod kabahin kini sa dagat nga naagian sa Coastal Road nga ilang gitambakan nga karon giokupahan sa 108 ka pamilya nga apektado sa demolisyon sa maong dapit.

Si Kapitan Tabac naghinaot nga matabangan sila sa pagproseso sa pagpatitulo tungod kay walay kapas ang kapunongan sa paglihok niini labina nga dako kini nga proseso.

Si Konsehal Cabanlas mibutyag nga kon mahimo kining mapatitulohan andam ang komite sa pagtabang sa kapunongan labina nga alang kini sa mga kabus nga nagkinahanglan sa permanenting kapuy-an.