Hangyo sa molopyo sa KM-8 Lumbia giaksyonan

ADUNAY nanag-iya sa loteng giukopahan sa mga molopyo sa KM-8, Lumbia, ning syudad.

Kini ang nasuta human sa gihimong structural survey sa mga kawani sa Task Force Emancipation of Piso Piso Benefeciaries subay sa panawagan ni konsehal Edgar Cabanlas, chairman sa komite sa urban rural poor and housing development.

Sa milabayng tigom sa komite, gipasabot ni Cabanlas ang mga residente nga kun mosugot ang tag-iya sa lote nga iya kining ibaligya sa gobyerno ug magkasinabot sa presyo pwede kining mapaubos sa onsite relocation program sa gobyerno.

Nunot niini, si Cabanlas mitambag sa mga molopyo nga makigtambayayong sa opisina sa City Housing and Urban Development Department (CHUDD) aron pakisayran ang mga rekisitos nga gikinahanglan aron makapahimulos sa maong programa.

Nasayran nga 63 ka pamilya ang nagpakitabang sa komite kalabot sa estado sa loteng gitukuran sa ilang mga pinuy-anan. (SP/MLRapanot)