Hangyo sa Mambuaya konsiderahon sa Urban Poor

KONSIDERAHON sa Komite sa Urban and Rural Poor and Housing Development ni Konsehal Edgar Cabanlas ang sulat hangyo sa konseho sa Barangay Mambuaya nga mahatagan og on-site resettlement area.

Gitumbok sa barangay nga madeklara ang Lot 20569-C, CAD 369 nga adunay gilapdon nga 120,187 metros kwadrado alang sa maong katuyuan aron matunol sa mga kasamtangang nanimuyo sa dapit.

Malaumon ang konseho sa Mambuaya nga lakip ang ilang mga molopyo sa dapit ang makapahimulos sa socialized housing program sa kagamhanan.

Niini, si Cabanlas gitakdang mopatawag sa tigom ug magdapit sa kadagkoan sa mga ahensya sa gobyerno nga adunay kalambigitan sa programa sa gobyerno aron matuki ang hangyo ug mahatagan sa tukmang aksyon.