Hangyo sa LUMUPTODA giaksyonan sa komite sa P.U.

DALING giaskyonan sa Komite sa Public Utilities ubos ni Konsehal Romeo Calizo ang hangyo sa Lumbia  Uptown  Drivers Association (LUMUPTODA) nga mahatagan og permit pag-operate sa ilang mga unit sa bao- bao diha sa Barangay Lumbia.

Kini human ang kapunungan atol sa tigom sa komite niadtong  Martes, mipadayag sa ilang tinguha nga maka-operate o makapamasada gikan sa Lumbia paingon sa kasikbit nga barangay ug sa bukirang bahin sa syudad.

Matod sa taga Roads and Traffic Administration (RTA) nga niabot na sa ilang buhatan ang proposal sa kapunungan nga adunay resolusyon sa barangay nga nagsuporta sa ilang gisugyot nga rota, apan  ila pang  sutaon  kon dili ba kini moagi  sa national road.

Sumala ni Konsehal Calizo  nga atol sa  tigom sa Peace and Order Council, ang Land Transportation Office (LTO) nag-ingon nga  pwede kini ug depende lang  sa lokal nga kagamhanan kon unsaon nila  pag-regulate aron  nga maisyohan sa  gikinahanglang  permit.

Hinuon, aminado ang konsehal nga kulang gayud sa transportasyon ang mga hinterland barangays.

Niini, gihangyo ni  Konsehal Calizo  ang RTA sa pagpresentar ug pagsumite sa konsepto  sa rota sa bao-bao dinhi sa syudad sa sunod tigom sa umaabot Hunyo 13 ning tuig nga gilaumang tambongan sa mga kapunungan sa operators sa bao bao.

Ang maong tigom gitambungan usab nila ni  Konsehal Roger Abaday, Imee Rose Moreno  ug Agapito Eriberto  Suan.