Hangyo sa konseho sa Tablon giuyonan

Hayan matagamtaman na sa mga residente sa Barangay Tablon ang ilang hangyo nga mahatagan sa usa ka metros nga road right-of-way nga nakakonekta sa lote nga nahimutang sa Infirmary Facility Hospital sa dapit aron maagi-an sa mga molopyo.

Sa milabayng tigom sa komite sa Urban and Rural Poor and Housing Development nga gidumala ni acting presiding officer Konsehal Roger Abaday, mihatag sa iyang pag-uyon sa maong hangyo si Dra. Stephane Alagadan, acting chief sa maong Infirmary Hospital. Sa iyang bahin, si Abaday mibutyag nga kinahanglan usab kini alang sa mga molopyo ilabina panahon sa emerhensya tungod kay maoy duol ug pabor nga dalan alang sa mga molopyo sa dapit.

Niini, giduso sa komite ang hangyo ngadto sa konseho alang sa dugang pagtuki human masuta nga wala kiniy bikil ug makahatag sa kaarangan sa kinabuhi sa katawhan sa dapit.