Hangyo sa Konseho sa Brgy Mambuaya giaksyonan sa Urban Poor

GITAHASAN ni Konsehal Edgar Cabanlas, Chairman sa Komite sa Urban & Rural Poor and Housing Development, ang mga kawani sa City Housing & Urban Development Department (CHUDD) ug Task Force Emancipation nga makigkoordinar sa Konseho sa Barangay Mambuaya aron mahan-ay ang plano alang sa mga programa ug proyekto sa lote nga gipanag-iyahan sa syudad.

Sa tigom sa Komite kagahapon, mibutyag si Cabanlas nga maoy katuyuan niini nga masuta pag-ayo ang angayang makapahimulos sa On-Site Resettlement Program sa syudad hinungdan nga  girekomendar sa komite  ngadto sa buhatan sa Task Force ang pag-uyon sa hangyo sa konseho sa Mambuaya.

Gani naka-alokar usab ang tipik sa maong gidak-on sa lote nga gigahin alang sa pagtukod sa eskwelahan sa Elementarya ug High School sa dapit.

Gipasabot sa konsehal nga andam kanunay ang  lokal nga kagamhanan nga mopaluyo sa mga programa nga makabenipisyo  ang  mga kabus nga nanginahanlan ug iyang gihangyo  nga  mapadali sa pag-proseso aron  mapahimuslan sa mga molupyo sa dapit.