Hangyo sa KKPAI sa Tablon ipasuta ni Cabanlas

Gustong masiguro ni Konsehal Edgar Cabanlas, chairman sa komite sa urban and rural poor and housing development, kun pila ka mga pamilya ang apektado sa demolisyon diha sa Kahugpungan Kahayag sa Panaghiusa Association (KKPAI) sa barangay Tablon nga angayan usab nga makabenepisyo sa housing program sa dakbayan.

Kini ang pasabot ni Cabanlas sa mga molopyo atol sa tigom sa komite niadtong milabayng semana.

Matud ni Cabanlas nga andam motabang ang syudad sa pagpahilona sa mga apektadong pamilya apan kinahanglan nga mosunod sa insaktong proceso pinaagi sa pagpahigayon sa socio economic profile survey nga himoon sa City Housing and Urban Development Department (CHUDD) aron masuta kun pila ka pamilya ang angayang tabangan sa gobyerno.

Nasayran nga mokabat pa sa 326 ka miembro sa maong asosasyon ang mihangyo sa komite nga matabangan nga makabaton sa maong housing program.

Nunot niini, gihangyo ni Konsehal Cabanlas si Atty. Samuel Rollo, acting city housing and urban development officer sa subling pag-imbestigar sa dapit aron matino ug masuta gyud ang angayang tabangan ug kwalipikadong pamilya nga mahatagan sa relokasyon.