Hangyo sa Iponan Liners nasolosyonan na Calizo mipasalamat sa RTA

MALIPAYON si Konsehal Romeo Calizo nga nasolosyonan na ang hangyo sa Centro Iponan Jeepney Operators and Drivers Transport Cooperative (CIJODA TransCo) nga makalahos ang ilang ruta gikan sa Iponan paingon sa merkado sa Cogon.

Kini human gibutyag sa kadagkoan sa Roads and Traffic Administration (RTA) sa tigom sa Komite sa Roads and Traffic Management ni Calizo kagahapong adlawa nga gisukip na sa Local Public Transport Route Plan (LPTRP) ang gihangyong ruta sa kapunungan.

Mahinumduman nga midangop sa komite ni Calizo ang kapunungan human nasayran nga sa bag-ong plano taman lang sa merkado sa Carmen ang ilang ruta.

Ilang gipasabot nga dako ang epekto dili lang kanila ang maong plano kun dili sa kinabag-ang sumasakay gikan sa barangay nga kinahanglang mag-double ride aron makaabot sa merkado sa Cogon.

Dili na angayang mabalaka ang mga sakop sa kapunungan kay na-adjust na ang plano ug dako ang akong pasalamat sa RTA ug sa technical working group nga nag-umol sa LPTRP sa ilang pagtubag sa mulo sa CIJODA TransCo, pamahayag ni Calizo.