Hangyo sa Food Panda riders tukion sa 3 ka komite sa Konseho

Hugot nga gisugyot ni Konsehal Bernie Esparcia nga mabutangan o mabalik sa Food Panda ang ilang Hub o opisina dinhi sa dakbayan.

Kini ang unod sa special report sa konsehal sa sesyon sa konseho niadtong Lunes nga gidumala ni Bise Mayor Jocelyn Rodriguez.

Gipasabot ni Konsehal Bernie nga adunay mga mulo nga gipaabot ang mga riders ug lakip niini ang ilang hangyo nga unta matabangan silang mahangyo ang kompanya sa Food Panda nga makabutang og Hub nga diin makatubag sa ilang mga reklamo ug mulo ug dili kay diha lang kini motubag kanila pinaagi sa email o sa Food Panda App.

Gani, gihangyo sa mga riders ang konseho nga makapahigayon og hiniusang imbestigasyon ang mga hintungdan komite aron maaksyonan ang ilang mga mulo sa ingon mahatagan sa pagtagad.

Nasayran nga galisod usab ang mga riders pagdepensa sa ilang kaugalingon kon sila suspensohun o tangtangon tungod kay wala may personahe nga personal nga moatubang kanila kon aduna silay buot ipaabot sa management.

Niini, giduso ni Bise Mayor Rodriguez ang maong sugyot ngadto sa komite sa labor, commerce ug public utilities ubos nila ni Konsehal Gerlie Balaba, George Goking ug Romeo Calizo alang sa dugang pagtuon ug rekomendasyon.