Hangyo sa federation president sa Zone-5 Bugo giaksyonan

ARON masolusyonan ang hangyo ni Anita Yaeso, presidente sa Zone-5 Bugo Neighborhood Incorporated, giduso ni konsehal Edgar Cabanlas, chairman sa komite sa urban & rural poor and housing development, ngadto sa clearing operation team sa syudad ang gireklamong straktura nga gihimo ni Condrado Hebron sa dapit.

Atol sa tigom sa komite niadtong milabayng adlaw giklaro ni Cabanlas nga walay gahum ug walay labot ang konseho nga makapapahawa sa susama niini nga problema, apan andam ang komite nga mopataliwala sa panagsabot ug hangyo aron maangkon ang kalinaw ug panaghiusa.

Niini, nanghinaot ang konsehal nga dili na unta moabot sa punto nga modako pa ang maong problema.

Malaumon ako nga masuta sa clearing operation team ang dapit ug mahatag gilayon sa tukmang rekomendasyon ngadto sa komite, pamahayag ni konsehal Edgar Cabanlas.