Hangyo sa Canitoan transport coop giaksyonan sa Komite ni Calizo

PABOR si  Konsehal Romeo Calizo, chairman sa komite sa public utilities nga mahatagan sa  90  ka adlaw nga temporaryong makapadayon sa pagpamasada  ang   60 ka units  nga traditional jeepneys sa PN Road Canitoan Transport Cooperative.

Kini  human  si Luzviminda Escobidal, manager sa maong kooperatiba, mihangyo sa komite kagahapon  nga unta mahatagan  sa 90 adlaw nga temporaryong  makapamasada ang ilang mga traditional PUJs  aron makapanginabuhi ang mga operators  samtang pa wala pa  gipatuman ang Local Public Transport Route Plan (LPTRP) .

Matod niya nga sa  pagkakaron, dili pa gayud sila   maka avail sa modernization program tungod kay ang banko  dili pa mo-grant og  loan sa ilang kooperatiba tungod  wala pay implementasyon sa maong programa.

 Hinoon, si Mohammad Hajam Sarip, representante sa Land Transportation Franchising and Regulatory Board (LTFRB),  mibutyag  nga mahimo kining matugotan   kon  adunay panugot  sa lokal nga kagamhanan sa syudad.

Samtang sa iyang  bahin, si Engr. Nonito Oclarit sa Roads and Traffic Administration  (RTA) misanong usab  sa maong  hangyo.

Niini, ang komite gipaabot  mopasaka og resolusyon  nga maghatag og 90 ka adlaw nga panugot sa  kooperatiba nga  temporaryong  mapakapamasada ang ilang  60 ka units  nga traditional PUJ. (JRGalano/SP)