Hangyo sa brgy Carmen tukion sa komite sa public works

Magtigom karong alas 9 sa buntag diha sa hawanan sa konseho ang komite sa public works ni Konsehal John Michael Seno.

Tipik sa tukion sa komite mao ang sulat ni Kapitan Rosemary Lorna Uy sa barangay Carmen nga naghangyo matabangan ang mga pamilyang maigo sa gisugyot pag-abli og dalan diha sa Oak Street sa barangay.

Hisgutan usab sa maong tigom ang taho sa Office of the Building Official (OBO) kabahin sa sulat ni Maria Leonora Valdehueza ug mga kauban diha sa Barangay Consolacion nga naghangyo sa komite nga mapatubag ang TOYO Construction sa damyos nga nahiaguman sa ilang mga panimalay tungod sa gitukod nga Mega Dike Project.

Motambong sa tigom aron pagpaambit sa ilang opinion sila si Konsehal Roger Abaday, Joyleen Mercedes Balaba, Jay Pascual, Maria Lourdes Gaane, Ian Mark Nacaya, James Judith II ug Bise Mayor Jocelyn Rodriguez.