Hangyo ma-exempt mga subd sa garbage collection tipping fees tukion

TUKION sa gitakdang hiniusang tigom ugma sa alas 2:00 hapon sa tulo ka komite sa konseho ang hangyo nga dili na pabayron sa tipping fee ang mga subdivision nga adunay kaugalingong garbage truck.

Motuki sa maong hangyo ang komite sa Environment and Natural Resources ni Konsehal Eric Salcedo, komite sa Subdivision and Landed Estate ni Konsehal Edgar Cabanlas ug komite sa Finance ni Konsehal Edna Dahino.

Ang maong sugyot nga exemption ubos sa kondisyon nga kadto lang mga residual waste ang mahimong kolektahon sa mga subdivision. Kini subay sa nakalatid sa Section 4, Article IX sa Environmental Code of Cagayan de Oro.

Gipaabot motambong sa tigom aron sa pagpaambit sa ilang panahom ug opinion sila si Konsehal Salcedo, Cabanlas, Dahino, George Goking, Teodulfo Lao Jr., Romeo Calizo, Zaldy Ocon, Ian Mark Nacaya, Lordan Suan, Yan Lam S. Lim, Joyleen Mercedes Balaba ug Bise Mayor Kikang Uy.