Hangyo alang access road diha sa Brgy. 26, giduso ngadto sa CEO

PADAYONG gipaningkamotan sa Komite sa Public Works ni Konsehal Edgar Cabanlas nga makabaton og access road ang  gipuy-an sa Pakigbisog Homeowners Association sa Barangay No. 26  dapit sa USTP (University of Science and Technology of Southern Philippines).

Kini human si Villar Asregarces, presidente sa kapunungan atol sa gipahigayong public hearing  sa gisugyot nga Integrated Zoning Ordinance for Comprehensive Land Use Plan (CLUP) dili palang dugay  mipaabot sa ilang mulo nga sa  dugay’ng panahon  hangtod karon, wala pa gihapon silay  access road  nga dako unta kaayo og ikatabang kanila panahon sa emerhensya o kalamidad  gawas pa nga  nagpabilin usab ang problema sa pagbaha sa ilang dapit.

Mipasabot si Konsehal Cabanlas nga ang Department of Public Works and Highways (DPWH) nagpadayon nga naningkamot pagpangitag solusyon sa maong problema, hinoon kulang pa gihapon  kay  anaa  paman ang pagbaha sa dapit.

Niini, giduso ni Konsehal Cabanlas ang hangyo sa kapunongan ngadto sa buhatan sa City Engineers alang  paghatag  og solusyon  sa problema sa mga  residente.