Gulayan sa Paaralan Program gisuportahan ni Konsehal Suzette

SI Konsehal Suzette Magtajas-Daba, chairman sa komite sa edukasyon, hugot nga mipadayag suporta sa mga programa alang sa dugang kaarangan sa kabataan.

Kini human gipirmahan ni Mayor Oscar Moreno ang Memorandum of Understanding (MOU) tali sa kagamhanan ug sa Department of Education (DepEd) nga naglangkob sa hingpit nga pagpatuman sa Gulayan sa Paaralan Program ngadto sa mga giilang tunghaan dinhi sa dakbayan.

Mahinumdoman nga ang konseho sa syudad ubos ni Bise Mayor Kikang Uy mipalabang sa Ordinance No. 14085-2021 nga naghatag og katungod sa mayor sa pagpirma alang sa maong balaodnon.

Nasayran nga tumong sa programa nga awhagon ang mga estudyante nga mag-apil sa mga kalihokan nga may kalabotan sa agrikultura diha sa ilang eskwelahan aron bisan paman sa kalinghod sa ilang pangedaron anaa na ang kadasig, kahibalo ug interes nga makakat-on sa pagpananom ingon man ang kamahinungdanon sa agrikultura diin usa sa tinubdan sa panginabuhian sa tibook nasud.

Si Konsehal Suzette miingon nga dalaygon kini nga programa ug dako kini nga ikatabang ning panahon sa pandemya samtang anaa lang sila sa panimalay. Pinaagi sa pagpundo sa balay ning panahon sa pandemya ilang masagop ug ma-apply ang ilang nahikat-onan sa eskuylahan pinaagi sa pagpananom sa prutas, gulay ug uban pa.

Inig-abot sa anihan dako kini nga ikatabang nga adunay supply sa pagkaon diha sa komunidad taliwala sa kasinatian sa pandemya,pamahayag ni konsehal Suzzette.

Niini gipasalamatan sa konsehal ang lokal nga kagamhanan sa dakbayan, DepEd ug Department of Agriculture (DA) sa ilang pagsuporta sa pagpatuman sa maong programa.