GrabCar naglaraw mag-operate sa CDO

TUN-AN sa komite sa public utilities ni Konsehal Romeo Calizo ang laraw sa Grab Philippines nga mag-operate og GrabCar dinhi sa syudad.

Kini human nakigkita ni Mayor Klarex Uy ang kadagkoan sa kompanya ug mipresentar sa gilarawng kolaborasyon tali sa kagamhanan sa dakbayan.

Nasayran nga ang GrabCar usa ka online car booking service nga magpadala og sakyanan ngadto sa sumasakay nga kustomer ug magdala niini gikan sa picked up point paingon sa napiling dropped off point sa hamugaway, limpyo ug luwas nga pamaagi.

Gibutyag nga ang GrabCar kasamtangang nag-operate sa National Capital Region, Cebu, Bacolod City ug Pampanga.

Niini, ang mga opisyal sa Grab dinhi sa Mindanao mihangyong mapaabot ngadto sa konseho ang ilang tinguha aron mapadayag ang mga benepisyo nga makuha sa publiko dinha sa operasyon sa Transport Network Vehicle Services kon TNVS.

Giingon nga ang operasyon sa GrabCar makatabang sa pagpalambo sa industriya sa turismo sa dakbayan ilabina dinha sa MICE industry kon Meetings, Incentives, Convention and Exhibitions ug magpalig-on sa position sa dakbayan isip convention destination sa Mindanao.

Kini gawas pa sa mahatag nga dugang kahigayonan sa mga interesadong TNVS drivers nga magsilbi sa komunidad.