Goking, Suan pabor mapatuman sa CDO QR Ph digital payments

PABOR sila Konsehal George Goking ug Aga Suan sa sugyot pagsagop sa dakbayan sa Cagayan de Oro sa QR Ph Digital Payments nunot sa Paleng-QR Ph Plus Program.

Sa tigom sa Komite sa Trade and Commerce sa milabayng adlawa, nasayran nga ang programa gipasiugdahan sa Bangko Sentral ng Pilipinas (BSP) ug Department of Interior and Local Government (DILG).

Gibutyag nga sentro sa maong programa ang kamerkadohan ug sektor sa transportasyon diin matod pa dako ang benepisyo sa cashless transaction.

Matod ni Suan nga pabor siya sa maong plano kay kini makahatag ug dugang kalamboan sa ekonomiya.

“We are in the internet and digital world it is a step towards upgrading,” pamahayag sa konsehal.

Sa iyang bahin, si Goking mipasabot nga ang katuyoan sa programa mao ang kaayohan sa tanan ug kini kabahin sa modernization nga angayang suportahan.

Sa maong tigom, si Area Director Olegario J. Magahin Jr. sa Bangko Sentral ng Pilipinas, namahayag nga sila mopahigayon og learning session aron pag-edukar sa mga mogamit sa Paleng-QR Ph.

Niini, si DILG City Director Engr. Jane J. Docallos midugang nga ang programa gilusad sa BSP ug nasudnong kagamhanan sa tinguha nga mapasayon ang mga transaksyon kay malikayan ang paggamit sa bills nga posibleng magdala sa kagaw.

Dugang pa, giingon nga kinahanglan usab nga ang sektor sa transportasyon mogamit sa maong sistema. Niini, gitakda ang pagpahigayon sa tulo ka higayon pagkonsulta sa publiko ug pagsabwag sa impormasyon alang sa gitingoha nga pagpalabang sa ordinansa nga ipatuman dinhi sa syudad.

Nasayran nga dili na mahimong problema ang pagsukli ug mas madali ang transaksyon, dili na makadawat ang mga mamaligyaay sa peke nga bills kay ang pagbayad pinaagi naman sa online.