Goking nangusog BFP mahatagan sa dugang ekipo

GIHINGUSGAN ni Konsehal George Goking, chairman sa Komite sa Trade and Commerce, nga matabangan ang hangyo sa  buhatan sa Bureau of Fire Protection (BFP) nga makabaton og firetruck nga gidesinyo alang sa mga high rise building ingon man ang dugang ekipo alang sa ilang buhatan.

Hisayran atol sa tigom sa komite nga gihangyo sa mga kadagkuan sa Bureau of Fire Protection nga magahinan ang maong buhatan sa tipik sa pundo sa Corporate Social Responsibility (CSR) para sa dugang firefighting equipment aron mahatag sa mga fire sub-station ug makabaton sa firetruck alang  sa  mga high rise building sa syudad.

Giangkon ni FSSUPT Rexcliburn Salvana, District Fire Marshal sa BFP, nga tungod sa paglambo sa syudad gikinahanglan nila ang dugang ekipo sa tuyo nga mapasayon nila ang pagresponde panahon nga adunay sunog.

Niini, gilaraw ni Konsehal Goking nga mohangyo sa nasud sa Taiwan pinaagi sa pag-abag ug pagtabang sa mga magpapatigayon sa syudad diin nasulayan na ang ilang pagtabang pinaagi sa ilang pagdonar ug firetrucks sa milabayng katuigan.

Malaumon si Goking nga pinaagi sa paninguha sa kagamhanang lokal ug pag-abag sa mga magpapatigayon sa syudad matubag ang panginahanglanon sa Bureau of Fire Protection.