Goking nangusog alang sa kaayuhan sa kabatan-onan

DUGANG pundo ang gipaningkamotan ni Konsehal George Goking, chairman sa kometi sa Ways and Means, alang sa kabatan-onan dinhi sa syudad ilabina sa bukirang bahin.

Gipasabot ni Konsehal Goking nga angayan mahatagan og dugang nga pagpakabana ang kabatan-onan tungod kay ang pinugngan nga lihok dala sa nasinating pandemya nakahatag og stress kanila.

Mas maayo nga mahatagan sila og suporta sama sa mga gikinahanglang himan sa paugnat sa kusog o’ pang-ehersisyo ug uban pang ekipo aron sila malayo sa mga dili maayo binuhatan ilabina sa druga ug mahatagan sa kabaskog sa panglawas.

Gani, angayan usab nga malantaw ang kabatan-onan nga wala na magtungha nga mapabalik sa pagtuon ug masuportahan sa ilang panginahanglanon labaw sa tanan magiyahan sa espiritohanon nga butang alang sa kalinaw sa ilang panghunahuna, dugang ni Goking.

Ang kabatan-onan mao ang paglaum sa atong nasud ug angayan nga matultulan sa insaktong direksyon sa ilang kinabuhi, panapos ni Konsehal George Goking.