Goking nanguna sa mga konsehal sa CDO nga mitambong sa Cebu PCL confab

NANGUNA si Konsehal George Goking sa mga sakop sa Konseho sa Syudad nga mitambong sa gipahigayong 2nd Series sa Philippine Councilors League (PCL) Quarterly Continuing Local Legislative Education Program (CLLEP) didto sa Cebu City.

Ang kalihokan gipahigayon sa Oktobre 3-5, 2023 didto sa Waterfont Hotel, Cebu City ug gitambongan sa mga National Executive Officers (NEO) sa kapunungan.

Si Goking, kinsa maoy PCL chairman sa rehiyon 10 mibutyag nga gihisgutan sa maong panagtigom ang mga programa pahaum sa PCL Week Celebration, paghatag sa bag-ong mga impormasyon kalabot sa operasyon sa kapunungan ug paghan-ay sa mga programa alang sa Culminating Activity sa umaabot Disyembre, 2023 alang sa End Term Assembly.

Itunol usab atol sa panagtigom ang pasidungog sa mga munisipyo ug dakbayan nga mananaug sa Local Legislative Awards (LLA). Tun-an usab sa maong panagtigom ang 2024 CLLEP Series nga gisugyot ipahigayon sa Boracay, Palawan, Cagayan de Oro ug Manila.