Goking nahingawa sa gikatahong pagsaka sa presyo sa karneng manok

DAKO ang kahingawa ni Konsehal George Goking sa gikatahong pagsaka sa presyo sa karneng manok gumikan sa nasinating avian flu o’ birdflu sa kasamtangan.

Gipasabot ni Goking nga ang kun magpadayon ang pagkaylap sa sakit, posibleng ang nasudnong kagamhanan mapugos pag-angkat sa karneng manok.

Kini nga lakang dili malikayan kun mosaka ang presyo sa karneng manok sa kamerkadohan ug niini maapektohan na usab ang katawhan, sumpay sa konsehal.

Mahinumdoman nga sa kasamtangan ang katawhan padayon pang nakasinati sa epekto sa taas nga presyo sa karneng baboy human sa nahiagumang African Swine Fever (ASF).

Matod ni Goking nga lain na usab nga problema sa ekonomiya ang giatubang busa angayan nga adonay pagtinabangay ug panaghiusa sa katawhan ug kagamhanan.

Dugang pa, ang problema sa karne masolusyonan pinaagi sa paggamit sa mga utanon nga makaayo sa panglawas sa tawo aron makunhuran ang konsumo sa karne, pamahayag ni Konsehal Goking.