Goking mitambong sa PCL Lanao del Norte general assembly

GITAMBONGAN ni Konsehal George Goking, ang gipahigayong Philippine Councilor’s League (PCL) Lanao Del Norte Federation General Assembly didto sa Kalimudan Multi-Purpose Hall, Capitol Ground Pigcarangan, Tubod, Lanao del Norte.

Si Goking, Regional Chairman sa PCL, mao ang pinasidunggang dinapit sa maong okasyon. Sa iyang mensahe, ang konsehal nag-aghat sa iyang mga kaubang konsehal nga gikinahanglang magbaton og kaugalingong pondo nga maggikan sa lokal nga kagamhanan nga magamit sa pagpatuman sa mga programa ug proyekto sa kapunungan.

Dugang niini, siya nanawagan sa panaghiusa sa tanang sakop sa PCL aron mahatag ang daling solusyon sa mga problema nga masinati.

Niini, dako ang iyang kalipay nga nagkahiusa ang tanan dinha sa pagpatuman sa kalamboan sa matag probinsya, munisipyo ug syudad dinhi sa Rehiyon 10 dala ang panghinaot nga mapadayon ang kawsa sa panagdait.