Goking mitambong sa kasaulogan sa World Food Day

SI Konsehal George Goking, Chairman sa Komite sa Trade and Commerce maoy mirepresentar ni Mayor Klarex Uy sa gipahigayong kasaulogan sa World Food Day diha sa Limketkai Atrium sa miaging adlaw.

Ang maong kalihokan nunot sa kasaulogan sa tibouk kalibotan diin gihiusa ang komunidad aron mapangitaan sa solusyon ang kakulangon sa pagkaon ug matubag ang problema sa mga nag-antos sa kagutom.

Ang kasaulogan nagdala sa temang, “paghatag sa kasayuran sa sistema sa pagkaon ug unsaon nga ang tanan magkahiusa sa tahas dinha sa pagsilbi nga mapakatap ang kahibalo sa seguridad sa pagkaon.”

Aron mapalig-on ang tinguha sa kasaulogan, gimugna ang Agro-Ecology Desk sa panguna sa Roman Catholic Archdiocese sa Cagayan de Oro (ACDO) uban sa The Samhana Institute.

Kining tulo ka adlaw nga kalihokan nagdala sa temang “Lambo 2023: Tubig, Pagkain, Kinabuhi Alang sa Tanan” ug tinguha nga mapasundayag ang mga produktong lokal ug tradisyonal nga pagkaon sa mga lumad nga katawhan sa komunidad.

Niini, si Goking nagdasig sa katawhan nga magdaginot sa ilang mga rekurso aron makalahutay taliwala sa mga kakulian nga matagamtanan sa kinabuhi. (APDelgra/SP/Photo screenshot during RPN DXKO Interview)