Goking misuporta sa panawagan mga socmed influencers magbayad og buhis

PABORABLENG gisuportahan ni Konsehal George Goking, Chairman sa Komite sa Ways and Means ug Trade and Commerce, ang panawagan sa Bureau of Internal Revenue (BIR) ngadto sa tanang social media (socmed) influencers nga magbayad og buhis.

Gipasabot nga subay sa Revenue Memorandum Circular (RMC) No. 97-2021 gipahinumduman ang tanang socmed influencers pagrehistro sa ilang mga negosyo sa Revenue District Office diin sila nanimuyo.

Lakip sa mga angayang magbayad og buhis ang mga mikita sa social media flatforms sama sa Youtube, Facebook, Instagram, Twitter, Tiktok, Reddit ug Snapchat.

Si Goking namahayag nga tumong sa BIR nga mahimong patas sa tanang negosyo ang pagbayad og buhis kay kini mao man ang gikinahanglan sa kagamhanan alang sa pag-angkon sa dugang kalamboan. (APDelgra/SP)